Fullkomnar falafel bollur með tahini sósu

Ég ELSKA falafel en því miður finnst mér ég einungis fá gott falafel á veitingastöðum. Ég hef margoft gefið frosnu bollunum séns eða reynt að gera sjálf en alltaf orðið fyrir vonbrigðum með útkomuna: þurrar og bragðdaufar bollur sem molna. Ég ákvað að gera eina lokatilraun um daginn og gera falafel bollurnar þá alveg eins og á að gera þær. Lykilatriðið sem ég hef alltaf klikkað á (sennilega því ég skipulegg máltíðir ekki fyrirfram og hata að þurfa að bíða) er að nota þurrar kjúklingabaunir sem eru lagðar í bleyti yfir nótt. Ég veit ekki hversu oft ég hef talið mér trú um að þetta geti nú varla skipt miklu máli en treystið mér: þetta breytir öllu!

Hráefnalistinn er kannski aðeins lengri en sum ykkar eruð vön en einfaldleiki uppskriftarinnar bætir upp fyrir það. Öllum hráefnunum, nema einu, er nefnilega skellt saman í matvinnsluvél og blandað. Ef matvinnsluvélin er öflug þurfið þið ekki einu sinni að saxa hráefnin áður! Því næst eru bollur mótaðar úr blöndunni og þær loks djúpsteiktar eða steiktar á pönnu upp úr olíu.

Fersku kryddjurtirnar gefa bollunum dásamlegt bragð og fallega grænan lit og vinnan við að leggja kjúklingabaunirnar í bleyti (eru ekki annars fleiri en ég sem mikla þetta svona fyrir sér?) skilar sér margfalt. Niðurstaðan verður þessar dásamlega bragðgóðu og djúsí bollur sem virðast fátt eiga sameiginlegt með þurra, bragðdaufa falafelinu sem þið mörg þekkið, að nafninu undanskildu.

Bollurnar má bera fram í vefju eða borða eintómar með tahini sósu. Tahini (eða sesamsmjör), nota fæstir að staðaldri nema kannski í hummusgerð, en þetta undarlega hráefni leynir mikið á sér. Sjálft sesamsmjörið er bragðmikið, beiskt og að mínu mati nánast óætt eintómt en þegar búið er að bragðbæta það með sítrónusafa, hvítlauk, smá sætu og salti umbreytist það í bragðgóða og silkimjúka sósu sem passar fullkomlega með falafel bollum. Ef tahini er ekki ykkar tebolli eru bollurnar einnig frábærar með raita jógúrtsósu.

Verði ykkur að góðu!