Poke skál er eins konar ósamsett sushi. Í stað þess að rúlla hráefnunum upp í lengju og skera í bita er hráefnunum raðað í skál og niðurstaðan er dásamleg! Poke skál gefur okkur þannig svipaðan bragðprófíl og sushi en er miklu einfaldari í gerð og hollari þar sem hlutfall og fjölbreytni grænmetis er talsvert meiri.
Í mína poke skál setti ég sushihrísgrjón í grunninn. Vel má nota önnur hrísgrjón eins og basmati en sushi hrísgrjónin gefa talsvert skemmtilegra bragð í skálina. Næst var ég með úrval af skornu grænmeti: ferskt rauðkál, gúrku, gulrætur, papriku, avókadó og svo skorið mangó. Önnur góð hráefni eru t.d. ferskt salat, kirsuberjatómatar, pikklaður rauðlaukur, radísur, vorlaukur og ferskt kóríander.
Mikilvægt hráefni eru edamame baunir (ég keypti frosnar í Krónunni – mæli með að kaupa þær sem eru ekki í sekk/hýði heldur þær sem koma alveg tilbúnar fyrir skálina). Þær eru gríðarlega hollar og prótínríkar en þær innihalda allar lífsnauðsynlegu amínósýrurnar. Stjarnan er svo vegan kjúklingur frá Ellu Stínu (glúten- og sojalaus sem hentar vel þeim sem eru með óþol eða ofnæmi) sem er eldaður í klístraðri teriyaki sósu.
Skálin er loks toppuð með heimagerðri chili-mæjó sósu sem er sérhönnuð til að setja punktinn yfir i-ið á skálinni. Mér finnst best að elda nógu stóra uppskrift og eiga hráefnin til í boxum inni í ísskáp fyrir nesti næstu daga.
