Þessi réttur er ekki einungis skemmtilegur útlitslega (fullkominn fyrir næsta matarboð) heldur er bragðið, ótrúlegt en satt, betra en útlitið gefur til kynna! Þessi uppskrift kemur svo innilega á óvart og eru þessar ofnbökuðu paprikur með quinoafyllingu orðnar einn af reglubundnum réttum heimilisins. Ég held að lykillinn við bragðið felist í tveimur atriðum. Annars vegar er quinoað soðið með grænmetistening sem gefur því betra bragð. Hins vegar inniheldur fyllingin ekki aðeins quinoa heldur einnig vegan hakk, gular baunir og svartbaunir. Hún er því ótrúlega bragðmikil og mettandi.
Ég er að reyna að vera duglegri að elda quinoa enda er það eitt hollasta korn sem völ er á – sannkölluð ofurfæða. Kínóa er mikið notað í hvers kyns matargerð og virkar það vel sem meðlæti (líkt og hrísgrjón) eða hreinlega sem uppistaða í máltíð vegna þess hve næringarríkt það er. Kínóa er verulega prótínríkt en það inniheldur 12-18% prótín og allar lífsnauðsynlegu amínósýrurnar – það flokkast því sem fullkomið prótín. Kínóa hentar einnnig vel þeim sem eru með glúteinóþol því það er glúteinlaust. Þar að auki er það ríkt af steinefnum og vítamínum. Kínóa hefur um 15 mín suðutíma (en rautt og svart quinoa þarf aðeins lengri suðu) en mikilvægt er að skola kornin áður en þau eru soðin til að losna við biturt bragð af húðinni. Kínóa dregur í sig mikið vatn við suðu svo mikilvægt er að fylgjast vel með og bæta við vökva eftir þörfum. Uppskriftina má einnig elda með t.d. hýðishrísgrjónum eða perlubyggi en ég mæli með að gefa quinoa séns.
Ég setti smá vegan ost yfir paprikurnar í lokin sem er frábær punktur yfir i-ið en alls ekki nauðsynlegt fyrir þau sem kjósa hreinni fæðu. Ég mæli svo með að toppa réttinn með ferskri steinselju eða kóríander.
