Bitarnir samanstanda af botni úr döðlum, möndlum og pekanhnetum, hnetusmjörslagi, dásamlega mjúku kókos-saltkaramellukremi og eru loks toppaðir með dökku súkkulaði. Þetta hljómar kannski flókið en í raun er uppskriftin rosa fljótleg þar sem hráefnunum er einfaldlega skellt í blandara/matvinnsluvél. Þessa bita hef ég gert reglulega í fjöldamörg ár og þeir vekja alltaf jafn mikla lukku. Eitt sumarið tók ég hnetubitana með í fimm daga bakpokaferðalag um hálendið (hollir og næringarríkir bitarnir eru fullkomið göngunesti!). Á leiðinni hittum við útlending sem gekk með okkur nokkra daga og ég gaf honum einn bita. Hann heimsækir Ísland og fjölskylduna reglulega og talar ennþá um hnetubitana. Ég ætla ekki að fullyrða að þessi fjögurra laga karamellu-hnetudásemd sé ástæðan fyrir tíðum Íslandsheimsóknum en ég get heldur ekki fullyrt að svo sé ekki…
Ég geri vanalega nóg af bitunum í einu því þeir geymast svo vel í frysti og mér finnst frábært að eiga þá til með kaffinu eða til að bjóða gestum upp á. Mjög auðvelt er að gera þá sykurlausa með því að skipta hlynsýrópinu í saltkaramellulaginu út fyrir fleiri döðlur og sleppa súkkulaðinu (eða nota mjög dökkt súkkulaði með litlum sykri). Tveggja ára strákurinn minn elskar þessa bita og við eigum reglulega gæðastundir þar sem við drekkum saman (koffínlaust) te og fáum okkur smá hnetubita.
Verði ykkur að góðu!