Fræbrauð

Mér finnst fátt betra en nýbakað brauð. Þetta fræbrauð er glútenlaust, bráðhollt, stútfullt af næringu og trefjum og þar að auki dásamlega bragðgott. Brauðið er með fjölbreyttum fræjum og hnetum og er ekkert hvítt hveiti í uppskriftinni heldur hafrahveiti og kókoshveiti (eða annað glúteinlaust mjöl). Brauðið er verulega seðjandi en tvær brauðsneiðar gefa mikla og góða orku inn í daginn.

Mér finnst glútenlaus bakstur oft verða þurr og molna en til að forðast það þá reyni ég að nota minna af glútenlausu hveiti og nota frekar glútenlaust haframjöl sem ég set í blandara og bý til mjöl úr. Til að binda brauðið enn betur saman blanda ég chia-mjöli við vatn en þá þykknar chia-mjölið og bindur hráefnin vel saman. Ég nota einnig eplaedik í uppskriftina en þannig fær brauðið góða og jafna lyftingu (engar áhyggjur, bragðið af því finnst ekki þegar búið er að baka brauðið). Mér finnst gott að setja örlitla sætu út í deigið, t.d. hlynsýróp eða eplamauk en það þarf þó ekki.

Það má leika sér með ólík fræ og hnetur í uppskriftina. Ég nota oftast hörfræ, sesamfræ, sólblómafræ og graskersfræ en af hnetum set ég t.d. möndlur og valhnetur. Einnig má breyta um glúteinlaust mjöl og nota t.d. möndlumjöl eða kókoshveiti. Uppskriftin nægir í eitt lítið brauð en mér finnst oft gott að tvöfalda hana því brauðið klárast svo hratt. Brauðið geymist nokkuð vel og er mjög gott að setja það í brauðrist.

Myndir eftir Aron Gauta Sigurðarson